Zomi Information and Resource Center

A beisa kumte ah, kha sim in Zomi teng Pasian' biak khopna ( Combine Service) kinei den a, tu hun ciang a hih leh kivaang mahmah ta hi. Inn sap, kikhopna ding mun sap pen nitaak khat $ 500 val bang a hi ta hi. Kipawlna sumte ong ne tum thei ding cih a kiphawk ciangin, a bei sa kum  khat lai a kipan kipawlna sum lo tawh Combine Service bawl bek ding cih ngaihsutna ong piang khia a, makaite leh mipite' tung pan a pia khia zozo a om leh tua sum tawh kikhopna a kibawl ahi hi. Tutung zong, tua aa ding kikupna om man lo ahih manin Secretary pu Pa Kam Sian Lian in a ma' ip sung pan a piak phawt dan hi in, maikaite' sung pan a pia zozo in piak kik ding a lametna tawh ahi hi. Tua hi a, Zomi Innkuan makaite pen a zahtaak huai mahmahte na hi uh hi.

Pawlkhatte leuleu in, combine service pen minam vai hi khol lo in, Pasian biak khopna hi a, pawlpite ciat ah zong up dan kibang teng in Pasian mah a bia khawm thapai kihi ta lel ahih ciang kisam sa nawn lo uh hi. Zomi Innkuan kipat tung in thukhunna ah a om phial zong in, pawlpi tuamtuam ong pian ciang, combine service neih den ding thukhun pen a dang minam vai khat peuhpeuh tawh khel ding (minam vai bangmah kinei tuan khol lo ahih teh) hoih sa uh hi. A hi zongin, makaite' lam pan ahih leh, tua bang ngaihsutna pen Pasian mangngilhna ahih ban ah thukhun a om sa khat pen zuih suak zawk ding hi cih ban ah pawl nei lo (pawl-lo pawl) te' aa ding Pasian biak khop theihna khat hi, ci in kep suak ding ngaihsun hi.